Todo o que che interesa sobre as esferas de reloxo

Unha das cousas máis divertidas de ter un reloxo intelixente é a infinidade de esferas que tes ao teu alcance. Como hai tantas entre as que escoller, é importante que saibas como atopalas e personalizalas. Para axudarche a explorar as esferas de reloxo, imos explicarche algunhas nocións básicas acerca delas.

Pensa na esfera do reloxo como se fose a pantalla de inicio do teu dispositivo. Aínda que o reloxo vén de fábrica cunha esfera estándar instalada, houbo programadores de todo o mundo que crearon unha amplísima variedade de esferas inspiradas en todo tipo de temas, como os deportes, as artes ou os reloxos clásicos.

Abre Play no teléfono e vai á sección Apps. Desprázate á pestana Categorías, baixo a barra de busca, e selecciona Esferas de reloxo. Aí podes explorar distintas coleccións de esferas (por exemplo, minimalistas, artísticas ou con motivos vexetais).

Tamén podes buscar esferas con termos como "moderno" ou "zodíaco" e, logo, cambiar de "Este dispositivo" ao reloxo baixo a barra de busca e aplicar o filtro de esferas de reloxo. Acouta os resultados en función da valoración, de se son premium (de pago) ou non, e moito máis.

Prefires facelo no reloxo? Abre Play no reloxo e toca a lupa. Logo, pon "esfera de reloxo" na consulta ou toca Esferas de reloxo baixo a barra de busca. Unha vez que te decidas por unha, descárgaa directamente no reloxo.

Podes almacenar unha chea de esferas diferentes no reloxo e intercambialas con facilidade. Mantén premida a esfera do reloxo para acceder a unha colección das que usaches recentemente (toca o signo máis para velas todas). Desprázate polos deseños e toca o que máis che preste.

Tamén podes usar a app complementaria do reloxo no teléfono, onde poderás ver as esferas descargadas e elixir a que máis che apeteza.

Hai moitas esferas de reloxo personalizables. Desde a app complementaria do reloxo, vai á sección de esferas de reloxo e toca a que queiras editar. En función da esfera, podes axustar cousas como a cor ou o deseño numérico. Tamén podes escoller as complicacións que queres que se mostren, como os pasos diarios, a frecuencia cardíaca ou a data.

Para cambiar a esfera directamente desde o reloxo, mantena premida, toca a icona da configuración ou a opción Personalizar e adapta a esfera ao teu gusto.

As esferas de reloxo son máis que unha simple escolla de moda. Poden ser unha forma de celebrar a época do ano na que te atopas, de levar contigo esa foto á que tanto cariño lle tes ou de ter de ollo os teus datos persoais. Agora que xa sabes como vai, mergúllate nas coleccións de esferas e presume da túa favorita.