Ինչ է հարկավոր իմանալ թվատախտակների մասին

Խելացի ժամացույցները կարող են ուրախացնել ոչ միայն օգտակար գործառույթներով, այլ նաև թվատախտակների մեծ ընտրանիով։ Իրոք, ընտրելու շատ բան կա, ուստի կարևոր է իմանալ, թե որտեղ փնտրել թվատախտակները և ինչպես հարմարեցնել դրանք։ Այդ հարցում ձեզ օգնելու համար մենք մանրամասն կքննարկենք թվատախտակներին վերաբերող մի քանի հիմնահարցեր։

Հիշեք, որ թվատախտակը ձեր սարքի հիմնական էկրանն է։ Ժամացույցը գնելուց ի վեր դուք չեք փոխել թվատախտակը, իսկ այս ընթացքում ամբողջ աշխարհի դիզայներները ստեղծել են անհամար թվատախտակներ՝ ոգեշնչվելով ամենատարբեր բաներից՝ սկսած սպորտից ու արվեստից մինչև դասական ժամացույցներ։

Բացեք Play-ը ձեր հեռախոսում և համոզվեք, որ «Հավելվածներ» բաժնում եք։ Բացեք «Կատեգորիաներ» ներդիրը, ապա ընտրեք «Թվատախտակներ» կետը։ Այստեղ կարող եք դիտարկել տարբեր հավաքածուներ, օր․՝ մինիմալիստական, գեղարվեստական և այլն։

Կարող եք նաև թվատախտակներ որոնել «ժամանակակից» կամ «կենդանակերպ» հիմնաբառերով, այնուհետև որոնման տողի ներքևում «Այս սարքը» տարբերակից անցնել ձեր ժամացույցին և կիրառել թվատախտակի զտիչը։ Զտեք արդյունքներն ըստ գնահատականի, պրեմիում (վճարովի) կամ անվճար կարգավիճակի և այլ չափանիշների։

Նախընտրում եք դիտարկել ձեր ժամացույցո՞ւմ։ Բացեք Play-ը ձեր ժամացույցում և հպեք խոշորացույցին։ Այնուհետև ձեր հարցման մեջ ներառեք «թվատախտակ» բառը կամ որոնման տողի տակ հպեք «Թվատախտակներ»։ Թվատախտակն ընտրելուց հետո ներբեռնեք այն անմիջապես ձեր ժամացույցում։

Ժամացույցում կարող եք զանազան թվատախտակներ պահել և հեշտությամբ փոխարինել մեկը մյուսով։ Երբ ընթացիկ թվատախտակի վրա երկար սեղմեք, կբացվի վերջերս օգտագործված թվատախտակների հավաքածուն (սեղմեք + նշանը՝ ամբողջ ցանկը բացելու համար)։ Թերթեք բոլոր տարբերակները և ընտրեք ձեզ դուր եկածը։

Կարող եք նաև օգտագործել ժամացույցի՝ ձեր հեռախոսում տեղադրված ուղեկցող հավելվածը, որտեղ կարող եք տեսնել ձեր ներբեռնած թվատախտակները և ընտրել ձեզ դուր եկածը։

Թվատախտակներից շատերը հնարավոր է հարմարեցնել։ Ժամացույցի ուղեկցող հավելվածից անցեք թվատախտակների բաժին և հպեք այն թվատախտակին, որն ուզում եք փոփոխել։ Թվատախտակի տեսակից կախված՝ կարող եք փոփոխել այնպիսի պարամետրեր, ինչպիսիք են գույնը և թվերի դիզայնը։ Կարող եք նաև էկրանին ավելացնել այնպիսի լրացումներ, ինչպիսիք են քայլերի քանակը, սրտի զարկերի հաճախականությունը և ամսաթիվը։

Թվատախտակն անմիջապես ժամացույցից փոխելու համար երկար սեղմեք թվատախտակի վրա, ապա հպեք կարգավորումների պատկերակին կամ «Հարմարեցնել»։

Թվատախտակները պարզապես նորաձևության միտում չեն։ Դուք կարող եք ընտրել դրանք տարվա եղանակին համապատասխան, որպես ֆոն դնել ձեր սիրելի լուսանկարները և հետագծել ձեր անձնական տվյալները։ Այժմ, երբ տիրապետում եք թվատախտակների մասին հիմնական տեղեկություններին, կարող եք ընտրել լավագույն թվատախտակը ձեր ժամացույցի համար։