वाचफेसका बारेमा सम्पूर्ण जानकारी

स्मार्टवाचको सबैभन्दा रमाइलो पक्ष भनेको आफ्नो रोजाइका असङ्ख्य वाचफेसहरू प्रयोग गर्ने सुविधा हो। स्मार्टवाचमा छानीछानी प्रयोग गर्न सकिने थुप्रै वाचफेसहरू उपलब्ध हुने हुनाले वाचफेस खोज्ने र तिनलाई कस्टमाइज गर्ने तरिका जान्नु जरुरी हुन्छ। तपाईंलाई यो कुरा जान्न सघाउन हामी वाचफेसका केही अत्यावश्यक जानकारी विस्तृत रूपमा प्रस्तुत गर्दै छौँ।

तपाईं वाचफेसलाई आफ्नो डिभाइसको होम स्क्रिनका रूपमा लिन सक्नुहुन्छ। तपाईंको स्मार्टवाचमा स्ट्यान्डर्ड वाचफेस पहिल्यै सेट गरिएको हुने भए पनि तपाईं विश्वभरका विकासकर्ताहरूले बनाएका खेलकुददेखि लिएर कला अनि घडीका क्लासिक डिजाइन झल्काउने असङ्ख्य वाचफेसहरू छानीछानी प्रयोग गर्न सक्नुहुन्छ।

आफ्नो फोनमा Play खोल्नुहोस् र त्यसमा भएको "एपहरू" खण्डमा जानुहोस्। सर्च बारको मुनिपट्टि दायाँतिर स्क्रोल गरी “कोटीहरू” ट्याबमा जानुहोस्, त्यसपछि “वाचफेसहरू” चयन गर्न त्यसमा ट्याप गर्नुहोस्। तपाईं त्यहाँ “मिनिमलिस्ट”, “कलात्मक” र “वनस्पतिजन्य” लगायतका वाचफेसका थुप्रै सङ्ग्रहहरू ब्राउज गर्न सक्नुहुन्छ।

तपाईं “आधुनिक” वा “राशि” जस्ता शब्दहरू प्रयोग गरेर पनि वाचफेस खोज्न सक्नुहुन्छ। वाचफेस चयन गरेपछि सर्च बारको ठ्याक्कै मुनिपट्टि रहेको “यो यन्त्र” लाई “तपाईंको स्मार्टवाच” बनाएर वाचफेस फिल्टर लागू गर्न सक्नुहुन्छ। खोज परिणाममा रेटिङ, प्रिमियम (सशुल्क) हो कि होइन जस्ता अन्य फिल्टरहरू प्रयोग गरी आफूले चाहेका वाचफेस भेट्टाउनुहोस्।

फोनको साटो स्मार्टवाचमा नै ब्राउज गर्न चाहनुहुन्छ? आफ्नो स्मार्टवाचमा Play खोल्नुहोस् र म्याग्निफाइङ ग्लास आइकनमा ट्याप गर्नुहोस्। त्यसपछि क्वेरीमा "watch face" शब्द हालेर खोज्नुहोस् वा सर्च बारको मुनिपट्टि रहेको "वाचफेसहरू" मा ट्याप गर्नुहोस्। आफूलाई मन परेको वाचफेस भेट्टाएपछि त्यसलाई सीधै आफ्नो स्मार्टवाचमा डाउनलोड गर्नुहोस्।

तपाईं आफ्नो स्मार्टवाचमा विभिन्न प्रकारका थुप्रै वाचफेसहरू भण्डारण गर्न र एउटा वाचफेसबाट अर्कोमा सजिलैसँग अदलबदल गर्न सक्नुहुन्छ। तपाईंले हालको वाचफेसमा केही बेरसम्म थिच्नुभयो भने तपाईंले हालसालै प्रयोग गर्नुभएका वाचफेसहरूको सङ्ग्रह खुल्छ (तपाईं आफ्ना सबै वाचफेसहरू हेर्न चाहनुहुन्छ भने जोड चिन्हमा ट्याप गर्नुहोस्)। स्क्रोल गर्दै आफ्ना सबै वाचफेस हेर्नुहोस् र आफूलाई प्रयोग गरौँगरौँ लागेको वाचफेसमा ट्याप गर्नुहोस्।

अथवा तपाईं आफ्नो स्मार्टवाचको सहयोगी फोन एप प्रयोग गरी आफूले डाउनलोड गरेका वाचफेसहरू हेर्न र तीमध्ये आफूलाई प्रयोग गर्न मन लागेको वाचफेस छनौट गर्न पनि सक्नुहुन्छ।

थुप्रै वाचफेसमा कस्टमाइज गर्ने सुविधा उपलब्ध हुन्छ। आफ्नो स्मार्टवाचको सहयोगी एपमा भएको "वाचफेसहरू" खण्डमा जानुहोस् र आफूले कस्टमाइज गर्न चाहेको वाचफेसमा ट्याप गर्नुहोस्। तपाईं वाचफेसको रङ र त्यसका अङ्कको डिजाइन जस्ता कुराहरू मिलाउन सक्नुहुन्छ। कुन कुन कुरा मिलाउन सकिन्छ भन्ने कुरा वाचफेसमा भर पर्छ। तपाईं दैनिक रूपमा हिँड्ने कदम, हृदयको गति र मितिलगायतका कुन कुन अतिरिक्त सूचकहरू देखाउने भन्ने कुरा पनि छनौट गर्न सक्नुहुन्छ।

तपाईं सीधै आफ्नो स्मार्टवाचबाटै वाचफेस बदल्न चाहनुहुन्छ भने वाचफेसमा केही बेरसम्म थिच्नुहोस्, त्यसपछि सेटिङ आइकन वा “कस्टमाइज गर्नुहोस्” मा ट्याप गर्नुहोस्। तपाईं त्यहाँबाट सजिलैसँग आफूले चाहेअनुसार वाचफेस कस्टमाइज गर्न सक्नुहुन्छ।

वाचफेसलाई केवल फेसनकै रूपमा मात्र लिन मिल्दैन। यसलाई कुनै खास अवसरको खुसियाली मनाउने, आफूलाई मन पर्ने फोटोहरू आफूसँगै राख्ने र आफ्नो व्यक्तिगत जानकारी हेर्ने माध्यम पनि बनाउन सकिन्छ। तपाईंलाई वाचफेसका आधारभूत कुराहरू थाहा भइसकेको छ। अब आफूलाई मन पर्ने वाचफेस चयन गर्नुहोस् र त्यसलाई स्मार्टवाचमा सेट गर्नुहोस्।